Les vôs dai Furlans sparniçâts ator pal mont

Monday, December 31, 2007

Bon Principi

Bon Principi a ducj i Furlans ator pal mont e in Patrie.

Saturday, December 22, 2007

Pene di muart abolide in New Jersey


Contrari al stereotip cal vûl ducj no atris merecans forcaiui, al New Jersey che di fat nol a eseguît nissune esecuzion sin dal 1963 al a uficialmentri abolide le pene di muart. In curt le cort supreme e varà di decidi se le iniezion letâl e je di considerasi in violazion dal otâf emendament ale costituzion cal proebis crudeltât in te punizions.Ma al semee ancje che al livel nazional al sedi plui di un ripensament, tant che atris stâts e stan pensant di abolile .


Reclams di fa pôre

Le campagne eletorâl Presindenzial chi in Americhe e je za di un biel toc in vore, al mes cal ven dopo lis primaris in Iowa e New Hampshire, planc planc le campagne e larà nazionâl e pe television e pe radio e scomençaran e trasmeti simpri plui reclams eletorâls.
Al e' simpri interessant viodi cemût che un candidât che fin a pocs mes prime al cirive al consens de base dal so partît al puarte les sôs ideis e al cirì di convinci l 'eletorât indecîs. Daur di ogni campagne e son studis demografics e miârs di oris spindudis par capi' in ce terminis cjacarà' cul eletorât . Sin dai timps dal famôs " Daisy Ad " di Lyndon Johnson al plui recent "Wolves ad" di Bush al us de pôre e le evocazion di emozions fuartis al e stat usât par podê trasmeti in mancul di 60 seconts un messaç sempliç e fuart al stes timp. Come confermât da chest recent articul le pôre e fas leve su une funzion primordiâl dal nestri cerviel tant plui potente de part razionâl. Colôrs, fotografis , musichis no dome e puedin evocà pôris ma ancje puartà a iniment memoris di timps miôrs o di une societât ideâl, come in tal famôs reclam politic It's Morning in America di Reagan . Come chest libri al conte, al messaç al ven assorbît plui come une emozion che come un concet o ideologjie.
Come che si svisìn alis elezions di Novembar, si viodaran simpri plui reclams, che proviodaran le fin dal mont in cas che al candidât oponint al vincedi, atris che prometaran al paradis terestri.Sperin ben, ma in ogni mut al sarà di ce divertîsi.

Pal moment al reclam politic che al a fate scuele :




Tuesday, December 18, 2007

Un toc di Europe in Nord Americhe

Cualchi an indaûr cjalant di dongje le mape dal Canada, o ai scuviert Saint Pierre e Miquelon dôs piçulis isolutis a pocs miârs de costis dal NewFoundland. Investigant al salte fûr che son i ultins teritoris de gloriose Gnove France ( la Nouvelle-France ) che une volte e jere le aree nord-merecane colonizade de France.E usin l' Euro, e tabain in Francês come tal no masse lontan Quebec e soredut si sintin plui Francês di chei de mari patrie .

Le robe curiose e je che ta cheste isule e je presinte ancje une component dal Pais Basc, tant che le bandiere basche e je presinte in te bandiere dal teritori. E fasin fieste in onôr alis lôr radis Baschis une volte al an cun tun Festival Basc .

Monday, December 17, 2007

Cjadenis di Nadâl

E cusi', al Sior Dree mi a imberdeât in cheste cjadene.

Tre agjetîfs par descrivi il to blog:

Forest, Zovin, Sparnicjat

Trops blogarìns astu cognossût di persone?

Nisun, pardabon. O soi masse lontan da chei Furlans....e da chei Merecans ancje.

Cuâl blogarin varessitu gust di cognossi di persone?

E son tacj blogarins che scrivin robis interesantis che mi plasarês di cognossi di persone. Se o fas une liste o soi sigûr di lassa' fûr cualchidun.

Cuâl isal il prin blog che tu leis la buinore?

Dipent de zornade, se o ai timp e se mi sint di lei alc.

Di cuâl blog tu fiestezaressistu la sieradure ?

Ma ce domandis sono chestis ? Mancul mal che je une cjadene di Nadâl. O soi pe libertât di peraule e espression par ducj.

Fâs talent scout: lancie un zovin blogarin-promesse.

Lis contis e son simpri interesantis : Cil Glaciat

Wednesday, December 12, 2007

Sante Luzie


Dopo tancj agns ator pal mont, une robe no me smentei mai da bon ex-frut Furlan.


Buine Sante Luzie. ( pronunciade Lussie )


Friday, December 7, 2007

Films merecans ?

Spes cun che le int in tal forest e pense a films merecans, e pense a films patinâts, atôrs famôs e storis che semein impussibilis , fûr dai semenâts ( in Americhe si sa' o sin ducj cussì )
Le setemane pasade leint al blog dal Jajo o ai let un post che mi a fat vignì a iniment une des mes passions. I films indipendents e mancul cognosus. Al semee spes e vulintîr che un biel toc de culture popolâr merecane no ven mai esportade plui di tant fûr dai confins nazionâi. E son films fats cun pocs capitai e pocje propagande ma che deventin in dai "Sleeper Hit" e ispirin int, e crein interês in cierts tipos di argoments. Par plasè o no plasè no scugnin jessi dai sucès o dai faliments monetaris , ma dome contà une biele storie e meti insiemit un film origjinâl. Un event impuartant par tancj filmadors indie al e' al Sundance Film Festival, un puest le che tancj dai films e an vût al prin sucès che ju an sburtâts a gloris plui grandis . Un par di nons di films passàs di che bandis e son : El mariachi, Napoleon Dynamite , Clerks . E contin di zovins stramps , pistoleros messicans e crisis post-adolessenzials, robis che o nus fasin ridi, visâsi de nestre vite o insumià di puescj mai viodûts.
Ma dopo e saressin ancje ducj chei films plui tradizionâi che mertin ma che plui di tant no son mai stâts sburtâts fûr dai confins merecans , un titul tra i tancj: Rushmore .
Un film che o tu lu odeis o no tu puedis di fa di mancul di viodilu une volte al mes .


Chi sot al film sperimentâl Peluca che dopo al sucès dal Sundance al e stat fat in tun film veri e propit: Napoleon Dynamite .

Friday, November 30, 2007

Mai vonde Firefox

Cjalant lis statistichis des visitis sul me blog , o ai viodût che e je ancjemò une biele fete di Furlans che sgarfin su Internet cul Internet Explorer... no dome ma su Google Analytics o ai notât che tancj no an le estension Furlane instalade sul Firefox.

Ben o cjapi le oportunitât par fa' un poc di propagande. Inanzidut al Firefox al e' tant plui stabil e svelt dal Explorer, tu puedis zontâ coretôrs orografics in marilenghe, tradutôrs, vocabolaris e tancj atris tramais. Ma al e' ancje l' unic sgarfadôr cal tabaie ancje par Furlan... come che si pues viodi de foto in bande.

Le instalazion e je semplice baste la' sul sît dal Firefox e scjariâ al sgarfadôr.
Dopo le auto-instalazion si va sul sît dal Firefox furlan le che o podês scjarià al Language Pack che al volte ducj i menu in marilenghe.


Par cui cal use Mac OS X, al Language Pack lu si pues instalâ seguint cheste procedure :

Une volte scjariât al file, viarzeit Firefox e tal spacio le che di solit o scriveit al non dal sît scriveit :

about:config

Fracait Enter/Invio e tal spazi le che al dis Filtri/Filter/Filtro scriveit :

general.useragent.locale

Fracait su le uniche vôs che reste e si viarz une barconete le co scrivarês :

Fur-It

Sierait e ri-vierzêt al Firefox . Et voilà al Firefox al e' voltât par Furlan.



Tuesday, November 27, 2007

Apatie politiche

Le apatie par dutis lis robis che an a ce fa cu le politiche in jenfri alis gnovis gjenerazions no le' monopoli di un pais. Jo o seguîs le politiche cu le scuse che jessint zovin o varai o di pati' o gjoldi le conseguencis de politiche di vuê par un grum di agns dopo che tancj dai politics e son lats in pension.

O cîr di no da par scontât les mes libertât costituzionâl come chest articul al conte e plui di une volte in Friûl che in Americhe mi soi cjatât in cheste situazion :




Wednesday, November 21, 2007

Un lunc fin setemane

Doman, le cuarte Joibe dal mes al e' "Thanksgiving" une zornade come pocjis. Come pocis parceche ancje se a une ispirazion religjose ( Ringracià al Signôr ) al di' di vuê e je cognossude come le zornade le che le fameis e i amis si cjatin par mangjà e sta insiemit. E je considerade une des fiestis plui merecanis dal moment che no fas riferiment a nissune religjon o culture in specific. E je une vorone sintude e ducj, dal imigrât apene rivât a le famee che je chi dai timps de Mayflower e fasin fieste .

No si pues smenteà che cun doman o sin uficialmentri in te Holiday Season (l' inizis de stagjon di Nadâl/Fin an/Hanukkah) e chest al vûl di che si viodin arbui di Nadâl, lus , e reclams pe television in teme fin ale nausie. E ancje par cheste rason al vinars cal seguîs Thanksgiving si clame "Black Friday" , dal moment che tantis buteghis e passin dai conts in negatîfs ( ros ) in positîf ( neri ) par vie de coincidence dal lunc puint feriâl e des tradizionâl svenditis. Se un turist forest al voledi viodi un dai aspiets plui stramps de Americhe vinars cal ven a 6 di matine fûr di un centri comerciial a cas al sarês un spetacul di no piardi.

Se no mi crodeis cjalait ca sot:



Wednesday, November 14, 2007

Robaris di chel atri mont

O ai simpri pensât che un politic cal vent al so ufici e le so credibilitât par une tangjente lu fasedi cun discrezion. O ai cambiade idee dopo ve' viodût un filmât fat di scuindon de FBI che mostre un politic de Alaska cal fas fieste ridint e scherçant cun tun client dopo ve' vandût al so vot par cualchi miâr di dolars. Le ironie plui grande e je stade sintîlu di' tal filmât di' scherçant " The bigger you are the harder you fall ".

Ma si sa' les robaris fatis a spese de democrazie e dal contribuent no son monopoli dai politicants . Une impiegâde de Citât di Washington DC e a spindût scuasit un milion e mieç di dolars in tai ultins siet agns in vistis e scarpis li di Neiman Marcus ( un puest costôs come pocs). Sigûr, al so stipendi anuâl di $81.000 no i varês mai permetût di spindi e spandi cussì tant, je e i soi colegas in tai ultins agns e an rilevât des cassis comunâl ben 30 milions di dolars sot forme di assegnos fals.

Links

"O vendarês l' anime al diaul " al a dite al politic Alaskian
Storie dai impiegâts comunâi che an robat passe $30 milions

Thursday, November 8, 2007

Tocs di Friûl in te suburbia merecane.


Ben, che altre sere o soi jentrât in te buteghe dongje cjase me' e su sugjeriment dal paron ti viôt une gnove sezion plene di biris forestis. Tal mieç di butiliis mai viodudis prime ti cjati une vecje cognossince .... le bire Moret.

Le sgnape e al vin furlan cun un poc di pazience si cjatin pardut, baste ciri' e no ve pôre a vierzi al tacuin ma le bire furlane e je une altre storie.

Cumò' so podès dome cjatà' al frico.....

E son tornadis lis French Fries

In te primevere dal 2003 propite cun che l' esercit merecan al pasave al confin Kuwait-Iraq su le vie di Bagdad al rest de Americhe e leve in vuere cun le France come al capite di solit almancul un dôs voltis ogni secul . Le situazion e jere cusi grivie che fûr di un ristorant francês une volte o ai viodût picjât un cartel cal diseve che i parons dal ambient e jerin Merecans e braurôs de lôr patrie. Le feroce vuere cuintri de Galie no dome si e fermade ai interès economics ma ancje cuintri espressions che di agnorums e fasevin riferiment ale France e a i Francês. Cusi invezit di "French Fries" e "French Toast" in cierts ristorants e te cafetarie dal Congrès si e' tacât viodi "Freedom Fries" e "Freedom Toasts" .

Cinc agns plui tart nol reste che al ricuart de polemiche trans-atlantiche, le France e un gnûf president e lis cartufulis fritis e son tornadis a clamâsi "French Fries".
E ducj e son daûr a bati le mans al gnûf president francês a Capitol Hill

Friday, November 2, 2007

Halloween ?

Halloween . Une fieste no propite sintude di cui cal a pasât i 11 agns da un piêc. Ogni an e va e ven, e se no tu as frutins in cjase nancje no tu ti visis. E a radis, un poc come al nestri pignarûl e i krampus te societât rurâl de Europe di une volte. Cui agns tal gnûf mont si e trasformade da une fieste tradizionâl de Irlande, in tune sorte di fieste par i plui piçui. Le coce intaiade cul lumin cumò e marche les fameis le che i fruts in mascare e cjataran caramelis e cjocolatis, ma al semee che sedi fie de storie e di diviersis tradizions. Par esempli, une volte e jere mitude fûr pe stradis e cjasis di Irlande par fa lus guidà une anime pierdude di non Jack, in Americhe lis cocis e vignivin intaiadis vie de stagjon de trebiaturis .

Leint i gjornâi al par che stedi cjapant pît in te so forme Merecane, ( fie de storie Merecane ) in Europe e come un film mal dopleât e sta cjapant dut un significât difarent. Si sint tabaià di setis religjosis, striis e di diu nus vuardi. No sai ce pensà, che no je di sigûr le fieste co cognòs jo. E o ai ancjmo di capi' cemût che funzionin les tradizions par importazion o par sintût di'.

A di le veretât come cal conte ancje IlFurlanist e esist une tradizion des cocis intaiadis cul lumin dentri ancje tal Friûl , propite te zornade de vilie dai sants.

Thursday, November 1, 2007

Forsit fra 100 agns o cambi cariere.

Tantis voltis vie co gusti al me panin tor misdì no pues fa di mancul di lei al gjornâl dal di'. Dopo ve let le pagjine dai editoriâi, o cîr alc che mi tiredi su di morâl . Cusi' che altre di' o ai lete le storie di Aubrey de Grey al a apene vierte une fondazion pe ricercje cuintri de vecjaie. Cemût che le viôt lui, dutis lis tribulazions che vegnin cu le etât no son atri che une malatie, le vite e je masse preciose par jessi vivude cusi pocs agns.

A di le veretât ancje al MIT Technology Review no le' rivât par un premit di $20.000 a cjatà cualchi sienziât cal dimostredi che le vecjaie al e alc che no si pues fermà.

Che sedi une scuse par fami lavorà fin a 250 agns ?

Le so fondazion
L' articul sul Washington Post

Friday, October 26, 2007

Lis musis de Americhe.

Timp indaûr o vevi scrit sui cliché Merecans tant cognosus ator pal mont. O eri rivât ale conclusion dal post disint che le diversitat e je le fonde de Americhe.

Al e poc ce fa', le storie dai ultins agns e an puartât ciertis impressions dai Stas Unis a cjapà ancjemò plui pît in tal forest. Le Americhe e je fate di int, e come Frank McCourt al diseve in tun dai soi libris " i Merecans e vegnin in dutis les formis e colôrs" .
Ma cui lu disie ale int foreste ? Cemût e dulà ?
Cusi' le Disney su direzion dal guviêr federâl, pro bono e a fat un filmât di cualchi minût cal mostre le muse de Americhe. Sigûr e pues vignì viodude come propagande, ma di une bande si scugne scomencia e in chest cas al sarà te salis di aspiet de Ambassadis merecanis ator pal mont e te salis doganâl dai aeropuarts merecans.

A di le veretât mi fas vignì a iniment une publicitât ( Ad Council ) che riclamave ale unitât nazionâl dopo l' Undis di Setembar le che si viodeve int di dutis lis etniis, religjons e etâts che disevin " I am an American "

Welcome: Portraits of America ( Gnûf filmât )
I am an American ( Ad Council )

Monday, October 22, 2007

Canadês Belgas, Merecans... ma ancje Furlans

Cun co ai tacât chest blog o vevi pôre che l' unic Furlan tal forest che lu leieve o jeri dome jo. Invezit iar dopomisdì dopo jessi stat lontan dal computer par scuasit 24 oris, ti scuvierç un gnûf blog par furlan dal Belgjo e un gnûf ami/letôr dal Canada. (Doriano)

Come che si pues viodi e come co disevi ancje un doi posts indaûr le furlanie foreste e je sparniçade ator par dut ( o scuasit ) il mont, e a mitût ju radis in culturis une vore diviersis.
Un Belga Furlan, un Canadês-Furlan e trê Furlans-Merecans, che magari se si fossin cjatâts su un avion , o in tun ristorant no si saressin nancje inacuarzûts de nestre comun radis Furlane.

Ben po, o soi propite content.

Friday, October 19, 2007

Le fieste de patrie in Tennessee ?

Cjale un poc ce che mi e' capitât,

Sgarfant su Internet o ai cjatât une famee che fas fieste al 3 di Avrîl ( Fieste de Patrie ).
Le robe plui strambe al e' stat scuvierzi dulà che son... un puest le che no mi lu sarês mai imagjinât: in Tennessee !
Kevin, al e' un Merecan di tierce ( mi par ) gjenerazion, ma no si e' smenteât di dulà che i soi antenâts e vegnin.

Une biele sorprese !

Thursday, October 18, 2007

Cui sono i Furlans ator pal mont ?

Si e' sintût par agns tabaià dai Furlans ator pal mont. Ma cui sino ? A voltis si sintin tocs di storiis, si sint tabaià di chel sens di identitât cal semee jessi cusi' fuart te comunitât de diaspore Furlane. Spes si smentee che je int prime di dut, int cu le so storiis cu le sôs ideis i soi mistiars e le sôs tribulazions. No je dome une prime gjenerazion, ma ancje une seconde e tierce, tirade su' cu lis storiis di tribulazions e i siums de prime. I furlans ator pal mont no son une entitât monolitiche, e son tancj i pais e les culturis le che an mitût ju radis. A voltis si son cjatâts di prime persone a fa' i conts cu le storie e i moments che an definît
les nazions le che si cjatavin.


Vuê us presenti al blog di Ivano Comelli, un merecan di pari e mari Furlans nassût in Californie a Santa Cruz ( bielissime citadine sul ocean Pacific ).

Li o cjatais fotografis e storis dal so borc de so vite e che dai Rancieri. Cui sono i Rancieri ? Ben po, lai a lei.


Thursday, October 11, 2007

No dome abc


Al semee che in curt si podarà ve "domain names" in caratars no latins. Par esempli fin cumò si pues doprà dome caratars latins (in te forme ASCII) tal non cal ven prime dal .com o .org. L' ICAAN ( Le organizazion che regule i dominis Internet ) lunis cal ven al tacarà a fa dai tests par viodi cemût che si pues cumbinà a ve' nons cun caratars che fin cumò no son stâts doprâts. Pal moment e stan lavorant su 11 lenghis/alfabets: Cines, Indi, Persian, Rus, Grec, Corean, Yiddish, Gjaponês e Tamil.

Magari un di' o varin ancje www.âêîôû.com


chi le storie

Monday, October 1, 2007

Al cil sore Udin

Come tancj Furlans che van in Friûl ogni muart di Pape, o usi une vore YouTube par cjatà' filmâts
su le Furlanie . Chi o ài cjatât alc di interessant : "Al cîl sore Udin" di Silvia Michelotti.



Friday, September 28, 2007

Libertât di espression ( Tierce part )

Burma

Le che i gjornâi e le televisions no rivin :

Ko htike Prosaic collection

Taxation Without Representation

Washington Dc, come che ducj e san e je le Capital Federal dai Stâts Unîs, fondade in tal 1790 cun dai teritoris cedûts dal Maryland e Virginia (tornats a cheste ultime in tal 1846 )
Les targhis de machinis regjistradis a Washington DC, e disin " tasazion cence rapresentazion" che in pocis peraulis e son ispiradis al slogan de rivoluzion Merecane "Taxation without Representation is Tyranny!".

Cemût mai ? E je une provocazion par bande de aministrazion dal "District of Columbia", dal moment che i residents dal distret no puedin elei un/e rapresentant cun dirit di vot al Congress come i 50 stâts federai e puedin.
A part par une limitade aministrazion municipâl citadine, le grant part de decisions su cuestions e vegnin cjapadis dal Congress Federal che i Washingtonians no puedin votà.
Une des conveniencis pratichis di ve' in Congress un rapresentant come citadin al e' chel di jessi judât cun che si an fastidis cu le burocrazie federâl. ( Ce che no si fas par jessi votâts )

Scuasit ogni an le aministrazion locâl e cualchi senadôr simpatetic a le cause e cirin di proponi une lec o un emendament costituzionâl cal ricognossedi al District of Columbia al dirit di votazion in Congress o le amission ale union come 51esin stat.
Ancje chest an e an tentât e come ogni volte e je lade strucje.

Forsit ur conven propite tornà cul Maryland par podè votà dai rapresentants cun diret di vot.

Sito de iniziative

Tuesday, September 25, 2007

Le libertât di espression...un esempli Merecan.

Metin al cas.

Tu as un personaç politic forest cognossût pe sôs ideis su le revision/negazion dal Olocaust
Al ven invidât a une conference ale Columbia University in New York une citât cognossude come progressiste e cjase par cualchi milion di merecans di origjine Ebraiche.

Dopo une setemane di antecipazion fate di polemichis sui gjornâi merecans e tension, come che si pues viodi de presentazion fate dal Dr. Lee Bollinger e je stade une impuartante lezion su le libertât di opinion e sui dirits garantîts dal prin emendament.

Friday, September 21, 2007

Al Belgjo cidin cidin al a cûr di spari'.

Leint in tai gjornâi ator pal mont al semee che par passe cent diis in Belgijo no rivin a metisi d' acuardi su ce guviêr fa' o su cui cal a di governà chest stat federâl formât de Fiandre de Vallonie e de aree capitâl di Brussells. E son stadis fatis les votazions e cumò' dut ale' ancjemò in tal limbo.


Se un doi mes indaûr le television Belghe par finte e veve dite che les Fiandris e vevin secedut dal Belgjo e ladis par lôr cont e al pais al jere scuasit colât in tal panic, cumò al semee che si feveledi pardabon . Dome un tierç de popolazion gjenerâl e pense che fra dîs agns al pais al esistedi come cal esist vuê. Chel al semee cal sedi sticjiat ancje dal fat che tes Fiandris viodude le situazion politiche plui int di prime e tache a viodi le dissoluzion come une alternative.


Chi sot par lei di plui :

Expatica
Bloomberg
New York Times

Friday, September 7, 2007

Le crisi dai Mutuos


Dree, al domandave timp indaûr di spiegà le "crisi dai mutuos" che i gjornâi ator pal mont e fevelin tant. No soi un economist, ma o cirarai di spiegâle miôr co pues.

Ce robe ise ?

Prime di dut, e je une crisi leade a ciertis istituzions bancariis che an investît une vore in securities ( azions di borse ) leadis al marciât dai mutuos subprime. In pocis peraulis ai prestits pe cjase fats a int che no podeve par motîfs economics e di precedents ve' al miôr pussibil tas di interess.

Cemût ise scomençade ?

Ben, le nature stesse dai clients che cjapavin in prestit centenârs di dolars in tun marciât immobiliar in cressite, al jere un riscjo di par se', ma se le domande di cjasis e continuave al riscjo di pierdi becs su un mutuo no paiât al jere simpri bas.
Chest al le' lat indenant par un poc, judât dai bas tas di interès de Fed, e de possibilitat pal paron dal mutuo di vendi le cjase e paià fûr al debit in cas che le robis no fossin ladis propite ben. Ma dopo, al marciât immobiliar si e' fermât, i presis de cjasis in ciertis bandis dal pais no cressevin ma e levin ju', i tas di interess sui mutuos variabils e son las su' e tante int si e' cjatade cun plui mutuo di ce' che podevin paià e cence le pussibilitât di vendi le cjase ( dal moment che tante int e jere te stesse situazion )
Cusi come in tun domino, le reazion e je tacade, tacant da cui cal a pierdude le cjase a le UBS AG che a pierdût 150 milions di francs par i investiments leâts a chest tipo di mutuos.
Chest dopo si e' sparniciat a magle di vueli su "Wall Street" e dutis lis atris placis di investiment ator pal mont.

No soi ne' un economist ne' un espert in materis finanziaris, chest al e' ce' che o ai capît leint i gjornâi e scoltant le radio.

Links par capi' di plui :

International Herald Tribune
USA Today
Cualchi storie di int che a pierdude le cjase

Wednesday, September 5, 2007

No o vin premure !


Une societât e je formade di diviersis gjenerazions, e ogni gjenerazion e a carateristichis colôrs e savôrs soi. Tal me tentatîf di contà le realtât e al pais le co vîf no pues smenteami de relazion tra le diviersis gjenerazions di merecans.
Le gjenerazion che sta' jentrant in tal mont dal lavôr in chescj agns e smanie di passà dai bancs di scuele alis posizion Manezarial daurman.
Cheste e semee jessi une de carateristichis de gjenerazion Y le fie dai Baby Boomers , une gjenerazion cressude in tune epoche di prosperitât ma ancje plui figotade e vissiade de chês che son vignudis prime. Zovins usas a Internet e ale tecnologje dai ufizis ma ancje cun pocje pazience par les lungjis gavetis.
Ise propite cussì ?
Par save' di plui, o podês lei le newsletter dal Harvard Business School e tabain propite di cheste gjenerazion... le me' gjenerazion.

Monday, September 3, 2007

Quebec....Canada ?


Lant su' pe interstatal I-87 in tal Stat di NY, dopo jessi pasàs par centenârs di kilometris di forestis e montagnis si scugne fermâsi pal puest di bloc de frontiere Canadese. Apene jentrâts in Canada, i segnai stradâi e le lenghe usade de int no je plui che Inglese, ma Francese o miôr "le français québécois", le varietât di francês tabaiade di chestis bandis.
Al semee un mont difarent dal rest dal mont anglofono, no dome le lenghe e je difarente ma ancje le maniere che le int si compuarte e al mut di fa' al e' une vore difarent di chel si e' usàs tai Stats Unis, no par nie cheste provincie e a' une fuarte identitât regjonâl, e une storie che va' indaûr 400 agns.

Ancje se le grant part dal Canada no tabaie par francês, in Quebec al francês e je le lenghe uficiâl de provincie, grazie ale "loi 101" ( al statût cal regole le uficialitât dal Francês in Quebec ) Propite le setemane pasade al 26 di Avost (1977-2007) a le' colât l' aniversari de aprovazion de lec. Al semee stranît che par che si ricognossedi al dirit di un popul di fevelà' le so lenghe mari cul guviêr si vedi spietât cusi' a lunc, ma le storie e je stade tant plui complicade e no simpri ducj e son stâts dacuardi. Le rason mari e semee jessi che si trate simpri che je une isule Francofone in tun ocean Anglofon e a tante int i da' fastidi che al Frances al vignedi tutelât. Ma chestis e son polemichis co lassi ai Canadês. :-)

Visità al Quebec e je une esperience uniche, soredut le regjon di "Ville de Quebec" ( capitâl de provincie ), le architeture e le atmosfere e a savôrs e colôrs di un atri continent, e le nature e i paesagjos e son cent par cent dal gnûf mont, (parcos naturâls, braidis, cascadis ....)


Particolaritât Culturial + tutele = une slavinade di turiscj di ogni bande di mont

Thursday, August 16, 2007

In Americhe i purcis e svolin.

A voltis cun co tabai cun tante int foreste che stan visitant i Stas Unîs mi vegnin i sgrisuli su ce che le int ator pal mont e pense su cemût che je le vite ca vie. Se o varès di la' daûr a corezi e barufà' su dutis lis bufalis co sint o pierdarês un grum di timp e amis. Su dut al esist un font di veretât, ma a voltis parsore si son montadis realtâts che no esistin o che son, cjapant in prestit une peraule taliane e inglese "sensazionalizadis".

A cui da' le colpe ?

Spes si met al dêt su ce che in Americhe al e' definît "Mainstream" , ce che al e' plui o mancul al minim comun denominadôr de nazion in culture, musiche guscj. Ma esistial par dabon ?
Come un articul umoristic e sarcastic dal "The onion" al scherzave cun : "Study: Majority of Americans Out of Touch With Mainstream" , le magjoranze dai merecans no le pense come le magjoranze e vorès. Un articul sul Time al semee propite dimostrà' cemût che le culture Merecane tal 21esim secul e je plui complicade di ce cal semee, plui diferenziade tant che al cusi' clamât "Mainstram" al sedi stat suiât da lis gnovis tecnologjiis che nus permetin di la' daûr a i nestris guscj e ideologjiis lontan de ombrene dai mass media tradizionâi.

Le diversitat e je cuasi simpri stade le fonde de Americhe, cumò o speri che ancje al rest dal mont si inacuarzedi.








Tuesday, August 7, 2007

Dut par un par di bregons....

Un zovin judic al jentre in tune lavandarie e al consegne un par di bregons. Al torne un doi dîs dopo e i disin che no rivin a cjatâju. Le setemane dopo ju cjatin, ma chest judic al dîs che chei bregons no son soi e al domande che i dedin $1000 pal damp. Al paron de buteghe al dîs di no'. Al client alore al decît di la' in tribunâl e fa' cause al lavandâr par ben $67 milions.

Parcè ?

Par dut al stress/esauriment che le pierdite dai bregons i a dât.


Al 25 di Jugn le Cort Superiore di Washington DC e a decidût in favôr dal lavandâr, ma come se nol fos avonde, al Gjudic chest mes i scjât al mandât e al semee che che no vedin intenzion di rinovagj al puest di lavôr, dal moment che si e' fate une brute reputazion...

par un par di bregons....

Wednesday, August 1, 2007

Une volte....


Un dôs setemanis indaûr o ai scrit cualis che son le esperiencis dai furlans imigrâts e dai lôr fis ator pal mont. Une robe, simpri dade par scontât e je le presince di fogolârs furlans in ogni bande di mont. Spes e vulintîr le storiis daûr ogni Fogolâr e Famee Furlane e son cognossudis dome a pôcs e spes cui che nol a mai lassade le Patrie nol cognòs dal dut les aventuris, faturis e umiliazions che in tancj furlans e an vivût ator pal mont.
Tantis voltis no jerin dome storiis di fan e miserie lassade daûr ma ancje di gnovis tribulazions in tieris forestis.
O ai cjatât une vore interessant un cjapitul in tal libri "Writing across world : Literature and Migration", tal ultin paragraf de pagjine 151 al conte cemût cal fogolâr furlan al funzionave tai agns '30.

Tuesday, July 31, 2007

Vôs Furlanis (part seconde)

Ogni tant sinti' simpri le stesse solfe pe radio al stufe... cusi cirint alc di plui interessant su internet o ai cjatat une Radio canadês che trasmet une volte ale setemane un programe par i Furlans di Toronto. Si clame "Mandi Mandi", e va in onde ogni Vinars alis 9.10 am EST ( ore di Toronto ).
Si pues scoltâle dal vîf , o se si a voie e son ancje des regjistrazions di intervistis, intervents e varis sul sît che si pues scoltà'.

Par plui informazions




Monday, July 23, 2007

A scuele di zentilece

Ogni tant ale' une vore interessant viodi cemût che atris culturis che son migradis tal forest e metin ju radis, e cemût che les lôr gnovis gjenerazions si compuartin te tiere di adozion.
Tai ains '80 e je stade une grande migrazion di Persians ( Iranians ), tai Stas Unîs, par motîfs politics. Come simpri cui che si pues permeti' di scjampà par prin par vie di une rivoluzion al e' cui che no dome al a' plui sintiment ma ancje plui risorsis.
Al sucêt che 20-30 agns dopo, i fis nassûts chi' e semein ve' pierdût che zentilece e galateo che definissin i Persians , e son deventâts une vore Merecans te lôr manieris e graciis . ( dopo dut e son nassûts e cressûts chi )

Une vore preocupàs di cheste tendence un grup di Persians-Merecans, al a decidût di fa' un "camp", le che no dome e puedin cjatâsi cun atris zovins di similis radis ma ancje rinfrescjasi sui costums dal vecjo pais.

Ce costums ?

Tipiche conversazion Persiane :

Ami' nr 1 Biele le to cjamese.

Ami' nr 2 Le vuelistu, te doi se tu as voe ? ( fasint moto di gjavâle )

Ami' nr. 1 Noo dome o disevi (.... se merecanizat Sigûr.... dâmi ca' )

Chi l'articul

Wednesday, July 18, 2007

In jenfri a doi monts

No jessi dome Furlans, jessi migrants o nasus in tun pais che par no atris no le' forest , ti puarte ogni di' a confrontati cun des realtât diviersis. Ti puarte a voltis a cjatâti in situazions une vore similis a chi dai Third Culture Kids, fruts che son cresus e an mitût ju radis in tun pais difarent di chel di citadinanze. Tu cognossis dôs culturis, dôs lenghis, tu ses cresut o tu ses lat a finì' (imigrant ) in jenfri a doi monts.
Si a cûr di la indenant e indaûr tra le tiere di nassite e che adottive, e cjatasi in situazions une vore strambis come cualchi an indaûr al contave un imigrant Talian di Boston al National Geographic, a Boston si sintive dome un imigrant ma cun cal tornave in feriis in Italie le int lu viodeve dome come un turist Merecan. ( leamp, al ocor paià par viodi l'articul intiar )

Par capi' di plui su le interazion tra les culturis, radiis e lenghis, a voltis no je miôr maniere che lei libris e poesiis scritis da le int che chestis esperiencis les a vivudis di prime man.
O ai cjatât une vore interessant al scrit di Dore Michelut une Furlo-Canadese che tabaie de so esperience. Tra i libris che a scrit al e' A Furlan Harvest, un libri scrit in Ingles cal tabaie di lenghe e imigrazion. Un altre interessant leture e je" Friulani Writers in Canada: Elegy for the Future " si tabaie di migrazion e culture furlane in Friûl e Canada.





Sunday, July 15, 2007

Vôs Furlanis



Lant ator pe ret o ai cjatât une radio argjentine che prodûs une volte ale setemane un programe sul furlan e i furlans clamât "Fuarce Furlans". Tal lôr catalogo on-line di trasmissions su mp3 , si puedin cjatà' intervistis , intervents e tant atri fats in lenghe furlane cun un tic di savôr argjentin.

Chi une cerce dal programe

Chi al sit de radio

Thursday, July 12, 2007

Ce cal coste a conta' bausiis


Un dai tanc dovês come citadin di un pais le che al sisteme legâl si base sul le "common law" al e' chel di servì in tune jurie . Nol capite spes a di al vêr, tante int no a mai scugnût fâlu. Al pues jessi interessant o mancul ma par tante int e je dome une grande secjadure. Un dai recuisîs par jessi acetâts dal judic al e' che no tu sedis prevignût cuintri nissune etnie, religjon o nazionalitât e che tu sedis une persone oneste. Ma al stes timp al e' obligatori e no tu ti puedis inventà' scusis.

Setemane pasade, un omp in Massachusetts al a' diclarât che nol podeve jessi amitût te jurie parcè no dome al jere razist e omofobic ma ancje bausâr. Al judic alore i a domandât se in chel moment al steve contant balis... e chel al a rispuindut che nol saveve, al podeve ancje jessi stat al cas.

A chest pont al judic fûr di se', lu a mandât a fa compagnie ale stesse int che chest balotaro al varès vût di judicà.

Lait chi par lei le storie

Friday, July 6, 2007

Furlans di Baviere


Luche Melchior, al e stat intervistât da lenghe.net , sul dotorât di ricercje in lenghistiche cal a fat su le comunitât furlane in Baviere.


Lait a lei le interviste

Luche, bulo :-)





Un "YouTuber" a spas pe Patrie


Simpri sgarfant su YouTube o ai cjatât chest filmât fat da un turist Inglês su les stradis dal Friûl . Biel viodi le nêf sul Matajur ....

Nol semee cal savedi tant sul "Furlan"... ma a mancul la viodût i cartei par Furlan.


Une Tiare cence int

Tantis voltis in ciertis areis rurâl de Americhe mi e' capitât di passà par paiis che e vevin viodût timps miôr. In gjenar si trate di ex boom-towns pais e comunitâts nassudis dongje di une miniere dâur o in tai timps plui recents di cjarbon ( agns 50 e 60 ). Tantis voltis al semee che ducj si sedin cjapàs su e partîs, e lassât daûr cjasis, buteghis e cjamps pustots, deventant cussì Ghost Towns.
Chest si capis e son piçulis comunitâts le che le int e veve pierdût dutis les oportunitâts di sbarcjâ al lunari e e son migradis di cualchi altre bande. Ma se invezit di une piçule comunitât dute le int di chest mont e sparis vie pe gnot, par trop adilunc le impronte de nestre civiltât (o inciviltât) restaressie evidente ? Cence impresaris, moredôrs e manutenzion stradâl, cence int su cheste tiere, trop voresie alis fuarcis de nature par distruzi lis nestris citâts, puints e autostradis ?

Un articul su Scientific American al fas une recension a un libri cal tabaie propit di cheste pussibilitât :

Chi l' articul

Friday, June 29, 2007

Cemût cal nas un pais



In tune nazion le che le popolazion e cres scuasit dal 1 % ogni an a le simpri bisugne di gnovis cjasis, scuelis e buteghis, chest si tradûs in gnovis comunitâts . Spes e vulintîr in tantis bandis di mont le planificazion e progjetazion di un pais e ven fate a tocuts vie plans regoladôrs e a discrezion de aministrazion dal moment .
Tai agns '60 un ciert James Wilson Rouse si e' rindût cont che le popolazion e sarês cressude e che gnovis cjasis e sarasin stadis fatis su' volint o nulint in te aree metropolitane di Washington DC.Di ce che al viodeve se le situazion e continuave come tai agns pasàs ( '50 ) tal zîr di cualchi an si sarês cjatàs cun un svilup de regjon disordenât e une sorte di Dystopie urbane.
Al jere un impresari idealist su chest no son fastidis, ma al veve ancje di fa' un franc, al a studiade le contee di Howard che je in jenfri di dôs citâts Washington/Baltimore, e al a progjetât une citât
di passe 100.000 animis le cal jere dome une autostrade interstatal e tancj cjamps di blave.
Cheste citât e varês vût di pare' bon, jessi ideâl par une famee, cun trois che van par boscs e prâts. Al stes timp, e varês vût di jessi tra les primis citâts in Americhe a ve une integrazion a le pari tra dutis les etniis. Cussi e je nassude Columbia , une des primis citât planificadis in Americhe, le stradis lis cjasis les scuelis e les buteghis e jerin stadis fatis su ben prime che anime vive si fos trasferide in cheste comunitât tal mieç des braidis dal Maryland. Ancje se al de di vuê e son scuasit 100.000 personis nol semearês che fos dute cheste int, e par bon a di al vêr, gnovis costruzions e son regolamentadis secont standards architetonics e al progjet e les specificazions origjinal. ( tant par no ve une scarpe e une çavate )


Un poc di sintiment e ambizion di bande di un impresari e a fat pussibil che deventedi une des mjor comunitats in Americhe par cualitât di vite.....

Fotos e un poc plui di storie sul puest

Thursday, June 28, 2007

E tabain di Tocai su YouTube !

O stevi sgarfant su YouTube cun che o ai cjatât une recension sul Tocai

(Tocai Furlan si capis )




Le Aquile blancje ( Bald Eagle ) no je plui a riscjo


Vuê al Dipartiment dal Interni al a gjavade le acuile dal cjâf blanc, da le liste des bestiis a riscjo di estinzion. (Endangered Species Act).
Tai agns '50 e '60 si jere rivàs une vore a riscjo che le acuile disegnade su tancj dai simbui dal guviêr federâl merecan e fasês le fin dai dinosaurs,e propite vuê e je stade diclarade uficialmentri fûr pericul dal Segretari dal Interni Dirk A. Kempthorne. Le popolazion cumò e supere i 70.000 esemplârs in dut al mont. ( dome metât e son in Alaske ).


L'articul dal Washington Post



P.S.
Al jere stat a so volte proponût al dindiat come simbul nazional, ma chiste je une altre storie.

Saturday, June 23, 2007

Amish e English


Guidant in te Pennsylvania
( ma ancje in Ohio ) ogni tant ti capite di viodi segnai stradâi une vore curiôs , che magari tu varessis viodût 13o ains fa' se fossin stadis stradis cun le segnaletiche dal di di vuê. Se tu cjalis ben ator tu viodis che je int che lavore tai cjamps usant vuarzinis e cjavai (o vacjs) propite come i nestris nonos nus contavin. Chiste no je le "twilight zone" ma dome une aree le che vîf une popolazion Amish.
I Amish par motîfs religjôs e stan ale largje di dutis lis conveniencis modernis, e vivin in borcs ducj lôr, taiàs fûr de popolazion gjenerâl no dome da de distance fisiche ma ancje des diferencis culturâl. Un articul recent su
NPR (Radio Publiche) e va oltri le solite retoriche turistiche e si va' in tes relazion tra i Amish e i lôr vicins di cjase "English" ( Une definizion Amish par cui che no le' de lôr religjon). E propit par chestis difarencis culturâl e dal stîl di vite cal compuarte no simpri e vegnin viodus di bon voli dai English.

Parcè ?

Lait a lei l'articul !

Friday, June 22, 2007

Mandi o soi gnûf

O soi un Furlan che come tancj atris in chest mont no son in Friûl o ven paiât in une valude che no je l' Euro, o vîf in tun pais le che no si tabaie ne Furlan ne' Talian. Pe television no son partidis di balon ma di "Football , Basketball, Baseball e Hockey.....e tant atri a di al vêr. Cun co pensi ale politiche no pensi al Montecitori ma a Capitol Hill Cun co voi al mâr no voi a Grado ma a Fenwick Island .

Forsit o ves za capît e nol ocor co ledi indenant, cence fale lungje o soi un furlan cal vîf tai Stas Unîs, le me vite di ogni di e je un tic diferente che a Udin, e forsit dut chest mi puarte a ve un pont di viste difarent. Cun chest sito o vorès fa' cognossi e cognossi les realtâts che esistin ator pal mont, contadis cun peraulis furlanis.
Sal le alc che o volês contribuî no steit a ve pôre, lassait un coment. Chest al vôl jessi un puest par dûc i Furlans sparniçâts ator pal mont.